政情：深水埗區會 「放飯」恒常化
根據《區議會條例》，各區區議會可以自行訂立會議常規，所以不同區議會都算係「各處鄉村各處例」。深水埗區議會主席張永森早前就向全體區議員發信，宣布運用區議會主席權力，喺區議會大會加入午膳時間，希望出席會議嘅議員同官員都可以有一段喘息時間。
盼紓開會緊張氣氛
張永森喺信中表示，由於區議會議程項目眾多，開會時間好長，所以由下星期嘅區議會大會開始，會安排一個鐘午膳時間。張永森接受查詢時表示，深水埗區議會一般由早上九點開始，有時開會至晚上十點先完會，官員同議員往往要坐定定，飯都唔敢食，而「放飯」令大家解決生理需要，亦令心情變好，可緩和開會緊張氣氛。
張永森又話，早前已經喺區議會轄下小組委員會試行「放飯」措施，認為開會效率不跌反升，所以決定恒常化「放飯」措施。其實午膳安排都算係區議會積存已久嘅問題，好似元朗區議會交通運輸委員會就試過有議員因為不滿未有安排午膳時間，於是要求點算開會法定人數，最終導致流會收場。唔知深水埗區議會恒常化「放飯」之後，其他區議會會唔會有樣學樣呢？