政情：涼薄「鬍鬚」 懶救Greg蘇

無去議廳打氣 隔岸觀火

其實泛民上月曾要求與政務司司長林鄭月娥會面，討論版權修訂條例嘅爭議，當時林鄭公開表明草案係由商務及經濟發展局負責，該局直屬財政司司長，並非政務司司長嘅管轄範疇，佢自己唔清楚、亦無能力與議員討論草案嘅詳細內容，所以拒絕與泛民會面討論草案。不過，佢喺上月底亦曾經帶同蛋撻、燒味到立法會，為坐定定喺會議廳內嘅建制派議員打氣。相反，作為Greg蘇嘅頂頭上司鬍鬚曾就似乎連影都無，對草案一直保持隔岸觀火嘅態度。

直至審議版權修訂條例嘅會議第五次流會，Greg蘇終於宣布提早跪低，為草案劃下「死線」，尋日仲警告若下周未能通過草案，就此作罷，今屆政府任內都唔會再提交立法會。雖然政府表面上解釋係為咗顧全大局，但眾所周知係為免拖垮財政預算案審議，萬一預算案被「拉布」拖延，香港財政隨時墮入財政懸崖，鬍鬚曾首當其衝。難怪Greg蘇為草案劃下「死線」後，鬍鬚曾個心定過抬炸彈，喺電台節目大講風涼話。

事不關己 自私「堆沙包」

鬍鬚曾話，版權修訂條例草案受到業界及法律界支持，對本港經濟亦十分重要，希望泛民下周支持法案通過。問到政府嘅做法係咪暗示主席會剪布，鬍鬚曾就話Greg蘇只係講清楚目前情況，真係擺出一副事不關己嘅模樣。對於唔少人批評預算案無新意，鬍鬚曾就話製造驚喜並非佢嘅作風，面對危機佢更願意防患未然，喺海嘯來臨前靜靜地堆沙包。如果鬍鬚曾識得居安思危，點解冇一早為版權修訂條例草案堆沙包呢？