中環出更：CY八個鐘收5.3萬個fb「嬲嬲」
社交網站facebook（fb）以往只有「呃like」用途，但從尋日開始，香港用戶仲可以利用fb對不滿嘅留言貼表示「嬲嬲」。fb新表情符號「嬲嬲」推出後，特首梁振英（CY）嘅個人fb內最新嘅留言貼，八小時內就能獲得超過五萬三千個「嬲嬲」，而且「嬲嬲」數字不斷上升，證明好多人對佢好不滿。
上載春茗相宣傳
CY於去年開始使用fb，一向只准朋友留言，亦無公開朋友名單。現時佢每逢出席公開場合後就將活動相片上載到fb宣傳，而尋日下午佢出席香港僱主聯合會春茗後又發貼。截至尋晚十一點，即發貼八小時後，該貼已經收集了超過五萬三千個「嬲嬲」、「讚好」就有一千三百多個、而「勁正」就只得八十多個，身為香港特首，認真失禮！
fb推出咗五個新表情符號，分別為「嬲嬲」（Angry）、「慘慘」（Sad）、「嘩」」（Wow）、「哈哈」（Haha）以及「勁正」（Love），香港用戶於尋日起可以使用呢啲表情符號。
卓妮