中環出更：唔止見過 史立德同喬布斯「研」包裝
創新及科技局局長楊偉雄好自豪曾經同被稱為科技界「神人」嘅Steve Jobs（喬布斯）有過一面之緣，結果被網民瘋狂嘲笑。仁愛堂日前喺沙田馬場舉行盃賽，主席史顏景蓮及一班董事均配合主題以桃花嘅色彩盛裝出席，充滿節日氣氛。卓妮見到主席丈夫兼仁愛堂前主席史立德，佢話唔單止見過喬布斯，仲喺生意上合作過添！
從事印刷及包裝生意嘅史立德話，其公司製造嘅多數係產品嘅包裝紙盒，例如iPhone同iPad嘅包裝盒。咦！咁佢咪見過喬布斯囉？咁梗係啦！史立德話，由第一代產品個包裝盒開始，佢已經同喬布斯一齊研究點製造，認為要打造一個國際品牌一定唔可以再用以前啲核突紙盒，要令人一拎上手就印象深刻，連掀起盒蓋時盒身慢慢向下墜嘅感覺都充滿品味，唔捨得丟棄咁滯。
App籌款助基層
講起近期英國脫歐風波，史立德話其公司都有產品出口到歐洲或英國，印刷機器亦全部德國製造，因此若歐元及英鎊波動，唔多唔少都有影響。生產及出口汽車零件嘅前總理徐炳光話，佢哋大部分生意都以美元交易，所以貨幣方面影響不大。同場仲有副主席曹貴子、總理何歐陽翠華等。
講番仁愛堂服務，除咗擴大轄下流動中醫醫療車隊之外，史顏景蓮仲成立咗一間青少年醫療中心協助有專注力失調或過度活躍症嘅人士，又資助基層兒童溜冰等等。
而曹貴子早前籌辦用來配對善長及多個慈善機構做善事嘅手機應用程式，早前就趁新年幫慈善組織籌到多封「利是」，並於正月十五到深水埗等地派發畀基層家庭。
卓妮
