政情：葉劉呻冇桃花運靠相睇
尋日係農曆正月十五元宵佳節，新民黨主席葉劉淑儀與傳媒茶敍慶祝，自爆同已故丈夫嘅一段姻緣係佢人生嘅唯一情史。葉太憶述，當年加入政府當政務官後開始「朝八晚八」生活，冇時間拍拖，直至廿八、廿九歲時，母親開始為其焦急，「係咁周圍推銷我」，更開始到茶樓食點心「相睇」搵老公。
葉太笑言，當年同丈夫嘅擇偶條件一拍即合，只要求對象係大學畢業，但二人首次約會後，一個禮拜後再到流浮山展開初戀飯局，二人拍拖半年即結婚。
聞做特首 話「唔講得」
葉太又自言天生欠缺桃花運，事關佢於女校畢業後入讀港大，因成績名列前茅被稱為「狀元女」，又不願參加「抽水派對」同男生「摸身摸勢」，加上曾經同佢約會嘅男仔都覺得其性格太認真，因此大半生都與男性絕緣。
此外，葉太談及九月立法會選舉初步部署，透露自己同黨副主席田北辰計劃角逐連任，並於名單中排名第一，佢表明冇興趣做下屆立法會主席，因主席工作猶如班主任一樣；當問及有否興趣做特首，葉太則稱「唔講得」。