俗語話，好嘅開始係成功嘅一半，壞嘅開始係失敗嘅一半。其實計功夫茶話齋，香港猴年開局不順，七國咁亂，何止係失敗嘅一半，睇怕成年都冇運行喇。
大家有眼見，新年流流就爆發旺角暴亂，香港變成戰場，暴力橫行，法治蕩然，令人不寒而慄。中國人講究意頭，過新年最緊要一團和氣，如意吉祥，點知家陣搞成咁，你話係咪大吉利是吖？最慘嘅係，社會戾氣好似病毒咁迅速擴散，連屯門良景邨無牌熟食小販違規擺賣都引發大型民眾衝突，最後仲演變成集體毆鬥事件添。開講有話，一年之計在於春。猴年伊始，香港就家嘈屋閉，動盪不安，未來一年想有好日子過都幾難喇。
其實，莫講新年開局不順，近年香港風雨不斷，紛紛擾擾，早就永無寧日。尤其係佔領行動之後，成個香港好似中咗邪咁，政府施政混亂，立法會烏煙瘴氣，社會內鬥內耗，連被視為象牙塔嘅大學都嘈喧巴閉，再咁落去，遲早攬住一齊死嘅咋。就講立法會拉布吖，以前反對派仲有啲譜，主要針對有重大爭議性嘅議題，依家就統統唔放過，係又拉布，唔係又拉布，連民生議題都唔放過，擺明車馬要癱瘓議會，癱瘓施政，癱瘓香港。今日港府乜都做唔到，只能望天打卦，香港競爭力跌跌不休，又點會有運行呢？
難為內地官媒仲自我安慰，話如果旺角暴亂能夠令絕大多數港人睇清楚激進本土派嘅本質，及時重塑香港嘅法治，可能就係香港自我救贖嘅一次機會喎。無疑係苦口婆心，可惜只係阿Q精神咋。正如有人話齋，香港愈來愈政治化，激進組織好似「中咗毒」咁，頭腦狂熱，任意妄為，與當年嘅紅衞兵冇乜分別，同佢哋講道理，等於對牛彈琴嘅咋。呢，策劃旺角暴亂嘅搞手揚言，寧為玉碎，不作瓦全，擺明要繼續搞事，非將香港置於死地不可。大家話嘞，喺政治狂熱蓋過一切嘅今日，香港點樣自我救贖呢？自我毀滅就真！
講起令人唏噓不已，香港曾經係福地，一向繁榮安定，安居樂業，點知回歸之後風兩不斷，吵吵鬧鬧，福地淪為亂地。啱啱踏入猴年，壞消息就一浪接一浪，政治方面固然紛爭不斷，經濟方面同樣危機四伏，尋日猴年首個交易日股市就跌咗七百幾點，預示前景不妙，呢個猴年都幾難有好日子過，大家最緊要自求多福。
講到底，禍福無門，惟人自招。香港一味內鬥內耗，日日家嘈屋閉，政客興風作浪，港府束手無策，神仙都救唔番喇！