中環出更：葡萄酒「三貴兩明」 炫「耀」銷情

香港葡萄酒商會早前舉行周年酒會，Henry形容，葡萄酒業界有「三貴兩明」，其中「三貴」係指租金貴、工資貴，但酒價唔貴，而「兩明」係價格太透明、消費者太精明，尤其業界係以中小企為主，所以可以撐住嘅都係好厲害嘅業界精英。

餐飲界憂新春後難捱

同場仲有楊位醒、香港貿易發展局展覽市場拓展總監溫少文、法國食品協會香港及澳門區總監馬餘璇（Anita）、阿根廷駐港總領事法沙爾、意大利商務專員姬寶娜等人。

楊位醒慨嘆餐飲業經營艱難。

馬餘璇（右）及溫少文都有出席與業界歡聚。

講到農曆新年嘅市道，楊位醒話，餐飲業訂位情況唔算差，不過佢擔心過完年後，可能有人會捱唔住，事關近年市民除咗大時大節照常消費外，其他日子就慳住使，形容業界情況真係好慘。

正所謂「有危就有機」，Anita就展望未來尋找更多商機，佢話港人好鍾意法國葡萄酒及鵝肝，又話法國有數百種芝士，而且食芝士猶如中國人食米飯一樣，再者愈來愈多人都鍾意食芝士配紅酒，因此認為值得喺香港進一步推廣。

卓妮