政情：公大嚴苛 黃玉山跑住接投訴
外界流傳公開大學係「入學易、畢業難」，公大校長黃玉山早前出席活動時自爆跑馬拉松比賽時，遇到有名人嘅太太向佢當面投訴，話喺公大讀教育碩士要考試好慘，而佢嘅丈夫喺另一間大學同樣讀教育碩士，似乎就冇咁大壓力，又唔使考試喎。
被指課程難考試多
黃玉山話，不時遇到有人當面投訴課程難，而且多課堂上、又多功課及考試。佢解釋，公大要獲社會認受，課程都比較嚴謹，而考試考得深嘅原因係八大院校中，有兩百多個教職員幫公大做校外評核，不過佢其後話都會想辦法，諗吓點樣令到課程靈活啲。
黃玉山又話，自己未出任公大校長前，曾以為公大全職本科生公開試成績較弱，會較難搵工，但做校長後發現其實公大就業率都唔錯，合共有八成六。佢相信與同學特別勤力，搵工又務實有關。