政情：八網難逃：及時阻火警 政助好英偉

民政事務局局長政治助理徐英偉（Caspar）及時阻止祝融之災！Caspar前晚於社交網站自爆，家中保母將慢燉鍋，直接放上爐頭度開火煮食，好彩Caspar啱啱放工返到屋企，先至阻止火警發生！據Caspar於社交網站貼出嘅照片顯示，其廚房灶頭黑咗一大撻，加上煲底變黑又留有痕迹，反映當時相當危險，幸好今次事件無人受傷。Caspar問完網民邊度有得購入滅火氈後，尋日就坐言起行，表明「屋企唔要熱廚房」，已經買定啲救火工具，睇嚟今次差啲發生嘅火警，都令Caspar一家喺防火知識方面上咗寶貴嘅一課！