政情：倡侍產假五轉三 不知所「芸」
公務員五日男士侍產假及法定三日男士侍產假分別於二○一二年四月及去年二月底實施，立法會議員蔣麗芸（Ann）昨於立法會一個委員會上忽然「倒米」，拋出公務員侍產假日數可考慮不加反減嘅建議，認為三日就足夠，真係語不驚人誓不休。
立法會公務員及資助機構員工事務委員會尋日開會，多名議員都關注公務員五日男士侍產假嘅落實情況，資料顯示有關措施由實施至今逾三年半，有超過一萬名公務員申領男士侍產假，阿Ann甫發言就「甩轆」，誤以為早於一二年實施嘅公務員男士侍產假，於去年才落實執行，佢隨後更提出驚人建議，問及公務員侍產假會否唔需要五日，其實三日就夠，公務員事務局局長張雲正回應指，這屬於相當危險嘅問題，強調公務員有需要才使用有關假期。
激嬲公務員 拖累民建聯
外界分析，阿Ann呢番言論相信最少激嬲兩大陣營，包括一直倡議七日男士侍產假嘅勞工界，以及逾十六萬公務員，加上阿Ann身為所屬政黨民建聯嘅人力事務發言人，如果唔及時澄清，分分鐘令人以為屬於該黨官方立場，到時先救亡就太遲嘞！