政情：廢鑊倘連任 政府優劣不分

任內多項政策捱批

廢鑊早年出任食物及衞生局局長時已劣評如潮，並曾被揭有僭建醜聞，二○一三年獲「翻閹」任平機會主席後，延續出任高官時嘅惹火作風，包括推動檢討及合併現行四條反歧視條例被指偏頗及越權，又曾公開支持同志平權，其後進行內部架構改革時疑「肥上瘦下」，例如亂花公帑及擴充辦公室等，因而被建制派議員梁美芬狠批為「歷屆最具爭議嘅平機會主席」。

尋日立法會一個委員會，梁美芬再次炮轟廢鑊立場偏頗，其後更於會議廳公開呼籲政府遴選新任主席時，要挑選一個令兩邊人士信服嘅人做主席。言猶在耳，曾任平機會委員六年嘅謝偉俊突然質疑梁美芬，稱對方唔係於恰當時間發表以上言論，但要數最爆炸性嘅內容，肯定係謝偉俊爆響口，原來廢鑊有報名參與主席遴選！

議員斥透明度不足

廢鑊死心不息博續任主席嘅消息一出，梁美芬形容對此感到驚訝，表明自己收到唔少關於廢鑊嘅投訴信，又趁機詢問當局可否增加透明度，交代一下主席候選名單。政制及內地事務局局長譚志源稱遴選進行中，內容基於保密同個人私隱，唔能夠向外提供資料，因此唔評論廢鑊係咪有申請續任主席。

謝偉俊其後或自知講多咗，表明如講咗唔應該講嘅嘢感到抱歉，又唔想出現陳文敏事件嘅翻版。有政界中人分析指，謝嘅最後一句認真可圈可點，事關陳文敏去年九月底被港大校務委員會否決出任港大學術、人事及資源副校長，如果廢鑊圖續任平機會主席一事係陳文敏事件翻版，莫非預示廢鑊亦會續任無望？