中環出更：官司纏身 曾蔭權偕妻風騷會碧咸
前特首曾蔭權爵士涉嫌干犯兩項「公職人員行為失當罪」嘅案件，已定於明年一月三日喺高等法院開審，並且預計要審成廿日，剩係控方都會傳召成廿六名證人。「審」期已定，一向識飲識食嘅曾蔭權夫婦尋晚又再風騷出巡，去咗中環一間超豪私房菜，一睹「萬人迷」碧咸嘅風采，仲逗留咗成兩粒鐘先肯離開！
碧咸今次係應一個國際慈善團體邀請來港，尋晚佢去咗中環一間私房菜出席一場私人宴會，吸引大批傳媒到場追訪。記者喺門外等等吓，到七點幾時居然見到官司纏身嘅曾蔭權拖住太太曾鮑笑薇，喺兩名G4（警方保護要人組）人員陪同下風騷到場，兩人入場時冇回應傳媒任何問題。
記者提問一概不答
曾蔭權夫婦約於九時三十五分，同樣在兩名G4護送下離開。記者問佢係咪同碧咸一齊食飯？有冇同萬人迷玩自拍？兩人一概不作回應，匆匆登上警方提供嘅專用七人車然後返回寓所。呢間私房菜有幾豪？據知唔計酒水，每位最低消費都要二、三千蚊。至於今次餐飯，據聞係由與曾蔭權同為英國爵士嘅鄧永鏘請客，但未知曾蔭權夫婦係咪由佢邀請出席。
卓妮