中環出更：千人宴送暖 新年工喜晒
長者奉獻大半生服務社會，工聯會（工記）尋日趁農曆新年前夕提早搞團年飯，一連三日宴請過千名長者出席飯宴，實行為佢哋獻上溫暖，身為主人家嘅工記多名立法會議員都有現身，其中麥美娟（Alice）透露工記踏入新一年喜事重重，工記中人輪住添丁或結婚，令到Alice都心思思，考慮為佢兩隻愛犬麥糖同麥棗搞生日會；至於人稱「嫻姐」嘅陳婉嫻則繼續為打工仔及長者發聲爭取權益，掛喺嘴邊都係力爭盡快落實全民退休保障、取消強積金對沖機制等訴求。
今次一連三日團年飯，一如既往都係為長者送上關懷，席間數數吓原來工聯會都喜事多多。Alice透露，勞工界議員郭偉強今年三月榮升爸爸，自己一早準備好封利是，咪以為折現就唔夠誠意，其實Alice思前想後，明白屋企多個細路開支大增，又知道郭偉強有請陪月員嘅打算，所以認為折現最實際。
麥美娟想幫愛犬慶生
除此以外，據聞有工記區議員年底亦會結婚，預料工記中人都要預備定人情準備大出血，此時Alice忽發奇想，話考慮為佢兩隻愛犬麥糖同麥棗搞生日會，仲提醒大家可以做人情，似乎Alice真係當咗兩隻愛犬係親生一樣咁錫喎！
同場仲有叙福樓集團執董黃傑龍（Simon），講到關懷長者之道，佢話長者鍾意食軟身食物係坊間嘅謬誤，有時其實同佢哋牙齒係咪健康有關，因此Simon今次團年飯特登為每位長者準備剪刀，希望方便佢哋進食。講起剪刀，原來Simon隨身「帶刀」出街，講緊就係佢新買入嘅手錶帶。呢個錶帶由生產開瑞士軍刀嘅製造商出品，錶帶內有刀仔去切割紙張，仲有小工具去敲碎玻璃添！
卓妮