中環出更：快車送光明 元旦紅盤宴
為內地貧困白內障患者施手術嘅健康快車香港基金，尋日趁元旦日舉行富貴吉祥紅盤宴，唔少政商界名人都畀面出席開餐。其中身兼健康快車副主席嘅保安局前局長李少光帶埋一家大細出場，早前不慎仆親休養半個月嘅食物及衞生局局長高永文，亦與太太江孟儀一齊出席，認真熱鬧。
江孟儀透露，高永文受傷後三日都開唔到眼，好擔心對眼會出事，好彩目前康復進度唔錯。不過最終縫咗七針，相信疤痕要三、四個月先會褪。卓妮問高永文受傷怕唔怕打針，佢笑言冇有怕，更自爆大腿曾經生粉瘤，本身係骨科醫生嘅佢決定「自己粉瘤自己割」，更何況區區一支針？至於傷後使唔使戒口，佢就話西醫冇戒口呢樣嘢，亦唔擔心破相，所以唔使去南韓「執執佢」，但笑言最近要戒影相喇！
前年李少光太太畀屋企外傭偷咗貴重首飾典當，李太話至今已經贖番八成失竊首飾，但就唔敢再請外傭。
李少光妻遇家賊 囡囡氹番
李太笑言，囡囡李卓穎為咗氹番佢開心，買番個翡翠吊墜送畀佢，囡囡咁識做，相信李太冇再介懷。
健康快車創會主席方黃吉雯就話雖然去年經濟麻麻，但籌款仍達標，四列快車已經為逾十二萬六千名內地貧困白內障患者做手術。不過，由於部分快車已經營運多年，唔少手術儀器都夠鐘替換，所以要加緊籌款至得。同場嘅前民政事務局常秘楊立門就拍心口，承諾會再幫手唱歌籌款，方太唔使擔心啦！
卓妮