槍響嚇醒街坊：個心離一離
【本報訊】元旦凌晨好夢正酣之際，李先生突被「砰、砰」兩響異聲嚇醒。李指「呢兩聲好響好真實」，似是槍聲而不似燒炮仗，心中頓起念頭：「係咪有事發生，所以有人開槍！」原來他所料不差，至早上他遇記者採訪，始知住所樓下發生便衣警開槍追截可疑人案件。
「好響好真實 唔似炮仗聲」
居住時雨樓高層單位的李先生指，「尋晚（除夕）十二點幾，我睇完電視有啲攰，就上床瞓覺，但無耐突然聽到『砰、砰』連續兩聲就扎醒咗。啲聲嚟得好突然，聽到嗰陣個心即刻離一離。」他表示因為以前在內地旅行時有玩過燒槍，所以昨凌晨聽到「呢兩聲都好響好真實，我一聽就覺得唔似係燒炮仗聲，因為我以前去過內地燒槍，所以我聽得出嗰兩聲係槍響！啲聲就好似喺我耳邊響咁，我嗰陣都有諗過，係咪有事發生，所以有人開槍！」惟他當時未知發生何事，故不以為然，很快便再次入睡，至昨早始從記者口中得知發生警員開槍案。
另外，住在甘霖樓的鍾先生稱，前晚十一時許他已睡覺，故未有聽到槍聲，「我一覺就瞓到天光」。不過，他指自己住彩雲邨已有約二十年，「呢度治安一向都幾好」，故向來打開門睡覺，而且「好多人（街坊）夜晚都出嚟行吓，唔覺得人流複雜，所以我都唔擔心，相信只是個別事件。」