- on.cc 東方互動主頁
- 4月2日 (三)
立法會「拉布」沒完沒了，財務委員會就政府成立創新及科技局撥款申請嘅拉布剛告一段落，但又變成財委會漫長拉布戰嘅開始。就創科局撥款申請提出數以百計臨時動議，但被財委會主席陳健波剪布嘅人民力量陳偉業（大舊）同社民連梁國雄（長毛），尋日就分別喺財委會提出休會及臨時動議玩嘢，結果兩個小時嘅會議只係通過咗一項撥款申請，睇嚟陳健波之後都有排捱喇。
財委會尋日開會審議長沙灣政府聯用辦公大樓施工前顧問服務及工地勘測工程嘅撥款申請，涉款一億三百二十萬元。有關撥款申請原本爭議性唔大，但大舊就喺會議開始大約十五分鐘提出休會動議，不滿陳健波喺上周五審議創科局撥款申請時剪布。大舊斥責陳健波為執行政府任務而有失中立，係立法會嘅恥辱，而與大舊同屬人民力量嘅陳志全更揚言會考慮喺財委會向陳健波提不信任動議。
雖然休會動議最後都被否決，但長毛、大舊等就繼續多次發言拉布，長毛仲喺會議結束前十五分鐘提出臨時動議，結果撥款申請喺會議臨近結束時先至通過。咁嘅進度睇嚟陳健波都要諗吓計喇。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
