政情：入泛民WhatsApp群組 陳健波驚洩密
早前政改方案一役，建制派WhatsApp群組內容外洩，自此一班議員對使用WhatsApp群組都有啲戒心。不過，泛民會議尋日中午與立法會內務委員會主席梁君彥及財務委員會主席陳健波會面時，就討論到點樣向泛民傳達內委會及財委會事宜。泛民就提議與陳健波開設WhatsApp群組，方便溝通，但陳健波就笑言，希望唔會外洩對話資料。唔知佢係咪怕泛民都好似建制派咁洩漏對話內容呢？
何秀蘭承諾不公開對話
陳健波話，佢喺會上承諾會跟從議事規則開會，但若有人利用灰色地帶，佢就需要處理。佢亦會檢視政府要求財委會通過撥款嘅時間表，唔會貿然全盤接收。陳健波更提出，可以出席每次泛民會議，但泛民就反建議開設WhatsApp群組溝通就可以。泛民會議召集人何秀蘭就承諾，唔會公開對話。
至於梁君彥就話，現時內委會副主席並非泛民議員擔任，但若佢每周同政務司司長例行會面後有特別事情，會直接與何秀蘭交代。何就話對此安排不滿意，重申「交代」唔能夠取代泛民直接與司長會面，但何稱泛民唔會主動要求與政府溝通，聲言要睇政府係咪願意先主動提出溝通。