有人話，灣仔嘅會議展覽中心外形好似一隻靈龜，鎮守香港嘅風水命脈。姑勿論呢種講法有冇根據，家陣香港時運不濟，各行各業遍吹淡風，靈龜自身難保，睇怕都幾難鎮守得住咯。
呢嗱，日前會展舉辦「時尚匯集」展覽會，招商廣告講到天花龍鳳，聲稱有七十個國家及地區嘅買家參加，參展商滿懷希望，以為訂單滾滾而來，點知人流稀疏，冷冷清清。有位首次來港參展嘅深圳廠商大吐苦水，指現場參觀嘅買家數數埋埋都唔夠一百人，搞到連日食白果，一張訂單都冇。生意做唔成都算嘞，最慘係攤位租金同酒店費用付之流水，賠了夫人又折兵。
一損俱損，今日香港經營困難，成績慘淡嘅又點止「時尚匯集」吖。會展每年三、六及九月都會舉辦「香港珠寶首飾展覽會」，其中以九月嘅展覽最有睇頭，被視為行內盛事，成為參展商接洽生意嘅黃金機會，可惜時移勢易，隨着會展業走下坡，近年盛況不再咯。有業界人士反映，今年九月嘅珠寶展人流明顯減少，舊客唔來，新客唔夠，接單量急跌五成，都咪話唔淒涼。
香港向來有「亞洲會展之都」嘅稱號，點解會淪落到門堪羅雀嘅地步呢？講起就長篇咯。話說香港會展業呢隻烏龜多年嚟被勝利沖昏頭腦，不思進取，場地等軟硬件設施停滯不前，反觀周邊城市急起直追，澳門固然後來居上，廣州及深圳等地嘅各項配套亦不斷提升，唔止網絡、布置及包裝等服務追貼香港，最大嘅優勢係展覽場地愈來愈大，令香港無地自容。
係人都知，香港大型展覽場地十幾年如一日，來來去去得會展及亞洲博覽館，總面積只得十三萬平方米，而廣州淨係一個琶洲展館，面積就達到四十萬平方米，簡直係小巫見大巫，參展商有大食大，香港唔流失客源至奇喇。
仲有吖，近年澳門、深圳等地積極催谷會展業，為參展商推出各項優惠，除咗減免租金、宣傳補助，有啲仲送埋酒店機票添。相比之下，香港冇優惠冇宣傳不特止，仲限制多多，加上酒店房價貴到無朋友，唔少參展商唔甘心被人當水魚劏，咪改去成本較低嘅城市參展囉。
正所謂，覆巢之下無完卵，會展業唔掂，旅遊、零售及飲食等行業一樣危危乎。大家有眼見，最近各行各業遍吹淡風，唔少老店相繼結業，連名牌店都棄租一線商舖，導致吉舖處處。正如有人話齋，再咁落去，香港隨時變成執笠港都似。
講到底，香港繼續故步自封食老本，遲早被競爭對手「殺龜取卵」，到時就乜龜都唔靈咯！