政情：助弱勢婦女 名媛「心蓮心」
家庭暴力個案近年有上升趨勢，為咗向遇到家庭問題的弱勢婦女及小孩提供更多幫助及支援，李錦記執董李惠雄太太Mahnaz Lee及Adler珠寶董事總經理何彭慧嫻（Patti）五年前創辦咗組織「心蓮心」協助佢哋，其中Patti透露，好多婦女遇到家暴問題都好無助，有個案係一個媽媽與兩歲嘅囡囡喺港鐵站流連唔敢返屋企，女孩一聽到列車廣播下一站目的地，就已經驚到震晒仲忍唔住喊，因此轉介畀佢哋幫忙尋找臨時居所。
另一方面，佢哋又開辦一啲插花、烹飪、整月餅等嘅課堂，亦同時為佢哋進行心理輔導，等佢哋有個藉口同身邊家人解釋去咗邊。
Mahnaz則話，最初同Patti都係各自參與唔同慈善活動，但發現捐款好多時被扣減開支後作用大減，因此合作成立「心蓮心」，而上個年度就將九成七籌得款項用在服務對象身上，而下月十四日佢哋舉行年度籌款晚宴，據稱絕大部分開支亦係佢哋成員自費喎。