政情：BB「佔領」葛珮帆辦公室
立法會間唔中都有學生參觀，但就鮮有見到BB仔蹤影，但近日竟然有個幾個月大嘅BB入侵立法會議員葛珮帆（EQ）辦公室！原來EQ嘅助理Angel因為屋企裝修，被迫要帶埋五個月大嘅BB沛霖返工。EQ對於BB返工好歡迎，仲幫BB改咗個乳名叫「包包」，事關BB臉仔圓圓好可愛。不過，玩人哋個BB就開心，但自己生就要負好大責任，所以EQ都決定咗唔生。
呻立會少支援母乳餵哺
受到大力推廣母乳餵哺嘅EQ影響，Angel今胎都選擇用母乳餵哺，不過佢發現立法會對母乳餵哺支援不足，雖然有母乳餵哺間，但衞生環境欠佳，又無簾遮掩，母乳餵哺時要同其他媽媽「你眼望我眼」。EQ早前就去信向秘書處反映，但八月至今都只係改善衞生情況，佢希望立法會可以盡快改善，而改善前佢就借出自己辦公室畀Angel餵母乳，認真唔話得。