中環出更：深藏不露唔驚爆竊
有「海產大王」之稱嘅中華總商會永遠名譽會長蔡冠深（Jonathan）尋日獲加拿大阿爾伯塔大學頒授榮譽法學博士，典禮在加拿大駐港領事官邸舉行。Jonathan話，呢個係佢第五個榮譽博士學位，但佢就話自己一九六七年開始已喺加國投資，近五十年後先獲頒博士實在太遲，又話希望利用自己喺兩地嘅網絡，加強中加關係。
日前滙豐銀行副主席兼行政總裁王冬勝嘅「大班屋」被爆竊，被竊匪掠去名錶及珠寶。同樣住山頂嘅Jonathan就話無有怕，事關佢屋企有閉路電視，又有鐵絲網，而且每年有保安檢查，更加重要嘅係佢有個好醒目工人，早幾年曾經有賊入屋，佢工人大叫嚇走個賊，最後力保不失，所以佢未驚過喎。
金器被偷 豁達面對
雖然保安工夫做足，但Jonathan都試過被爆竊，佢同太太十幾年前將父母嘅金器放喺舂坎角嘅別墅，點知就被賊人全部偷走，但佢仲識講笑話：「放喺佢（賊仔）度又係放，放喺我度又係放，無所謂啦！」
出席支持Jonathan嘅維特健靈董事長陳曦齡醫生（Helen），十幾年前都試過被爆竊，其深水灣別墅曾經被賊人光顧，但入面只有一對萬幾元嘅耳環，損失都唔大。Helen之後搵咗間有信譽嘅保安公司做保安工作，亦裝鋁窗換成鐵窗，至於有咩保安貼士，佢話最重要就唔好買咁多嘢，就無嘢可以被人偷啦！
同樣試過被爆竊嘅仲有莎莎主席郭少明，佢廿年前住南區時都被賊人光顧。佢話，唔會因為怕咗啲賊仔，而轉用銀行保險箱存放金飾及名錶，「放咗去保險箱咪等於長期唔可以戴，咁無樂趣」。至於佢會否好似Helen咁，買少啲嘢，佢就話「咁同叫我唔好賺錢一樣」，認真豪氣。
卓妮