孔夫子話齋，巧言令色，鮮矣仁。嗱，港府就係人辦喇，對全民退休保障制度拖得就拖，整色整水，滿口語言偽術，咪就係巧言令色嘅典型例子囉。
當局上星期公布本港貧窮人口有九十六萬，其中三十萬係老人，表面上窮人好似少咗，其實正正反映長者貧窮問題嚴重，設立全民退保刻不容緩。可能民意壓力太大啩，署理特首林鄭月娥尋日假惺惺咁話十分關注長者貧窮問題，仲重申年底會就全民退保展開諮詢添。大家以為港府終於良心發現喇，點知佢話鋒一轉，話無論從公共財政可持續性或者分配公共資源平等性，都對推行全民退保有好大保留，又話好多長者本身有資產同物業，制訂政策時需要對長者貧窮有更多認知咁話。
你話係咪涼薄吖，幾十萬老人活喺貧窮線下，港府唔止冇盡快推行全民退保，反而搵各種藉口推搪，咁同落井下石有乜分別？既然當局對全民退保有預設立場，仲使乜搞諮詢吖，索性慳番啲時間同精神，直接宣布唔做咪得囉，無謂搞埋啲假諮詢愚弄市民吖。
港產官僚對長者貧窮嘅認知有幾多，功夫茶唔知，只係知道推行全民退保係社會嘅主流共識，當局一味拖延，就係與民為敵。老人家為香港奉獻大半生，好多人辛勞一世，節衣縮食，至有一個棲身之所，港府居然咁都挑剔，唔通真係要公公婆婆賣咗層樓，連棺材本都用埋，連飯都冇得開，咁至有資格攞老人金？世界上邊有咁無良嘅政府架？
咪話功夫茶踢爆，港府聲稱為全民退保展開公眾諮詢，畀市民參考係假，玩拖字訣就真。當局唔止係愚弄市民，仲係愚弄學者，當初大鑼大鼓委託港大教授周永新團隊研究全民退保，點知研究報告已經發表咗年幾，倡議設立「全民老年金」，當局到依家仲死拖爛拖，所謂嘅諮詢究竟有幾大誠意，畫公仔唔使畫出腸喇！
講起真係可悲，香港係富裕社會，港府仲係全球最有錢嘅政府之一添，但至今未有一套完善安老制度，唔少老人風燭殘年仲要喺街頭執紙皮過活，港產官僚唔覺得羞恥嘅咩？最好笑嘅係，貧窮問題不斷惡化，港府仲認叻話貧窮人口下降，結果被人質疑不符事實，簡直係唔衰攞嚟衰。
正所謂，官視民為草芥，民視官為仇寇。港府對老人涼薄，全民退保一味卸膊，市民遲早忍無可忍，民怨大爆發嘅咋！