「惜身鬧革命，冇料選議員」；去年雨傘運動期間，黃毛小子聲大大在政府總部宣布「無限期絕食」，結果絕食唔夠五天就宣布頂唔順，期間仲要飲葡萄糖水……如此「絕食」，成為笑柄；不久前，邪惡教授穿針引線下，黃毛小子拍住李漢奸赴美唱衰中港，回來後不久，突然「開竅」，知道自己奀挑鬼命，怕死惜身，玩唔起「革命」、面無三両肉，最叻嘴藐藐，尤其chok住扮有型，如此這般，又如何「硬肩負重任，強臂挽危局」呢？
黃毛小子唔知是否有自知之明，還是受到背後乜嘢啟發，知道自己玩唔起「革命」，又鍾意亂噏無謂，贏得「爛果報」青睞，又有美媒盲目附和，一時間，黃毛小子變成「思想巨人」又變成「風雲人物」；阿哥，咁捧法，螞蟻都覺得自己係大笨象，甚至係史前暴龍喇！
黃毛小子或許有仙人指路，知道做街頭戰士冇出路又傷身，如果挑戰年滿二十一歲才可參選立法會嘅限制，若然真係申請司法覆核成功，佢話將考慮參選立法會，在「香港畸形政治生態」下，亦有唔少阿豬阿狗都進身立法會做議員喇，黃毛小子斗膽博一博，說不定單車變摩托！從此青雲直上，「匹夫而為百世師，一言而為天下法」，一個月有幾日答問大會時，拍枱拍櫈，chok住來鬧吓啲政府高官，又收成十皮嘢口水費，你都咪話唔爽死！
講開「單車變摩托」，想起相聲名家侯寶林在《夜行記》裏，說他買了一輛自行車（單車）：「嗨，你別看花錢不多，車還可以騎得過也，反正除了鈴不響，剩下哪兒都響。」黃毛小子若真有機會成為「尊貴的議員」，議事堂內肯定笑聲不絕：咪睇小我尖額面削！謬論都咁正，我係飲鉛水大嘅九十後，飲得多鉛水是否延年益壽我唔知，不過鉛水肯定可以幫助發展智能、辯駁口才！哈哈哈……