政情：今日你上鏡：港產女高音獲嘉許
能夠化興趣為職業係唔少人夢想，做到獲得政府嘉許就更難能可貴。港產女高音鄺勵齡（Louise）就係成功例子，尋日佢獲民政事務局局長劉江華頒發嘉許狀，表揚佢喺推動香港藝術發展嘅貢獻。
Louise九歲就加入合唱團，但直到中學參加校際歌唱比賽奪冠，先至正式拜師學藝，開展歌唱之路，之後多次喺香港同國際舞台上演出。Louise又話，曾經諗過轉做流行歌手，但始終覺得古典音樂變化較大同較彈性，有好大嘅發揮空間。佢自言掌握歌唱藝術並唔容易，好彩有同樣鍾意唱歌嘅老公，可以同佢互相切磋學習，兩公婆閒時喺屋企就會玩吓二重唱，認真特別。