體文界議員馬逢國早前當選立法會內務委員會副主席後，決定放棄出任人事編制小組委員會主席，隨即衍生新一輪主席布陣音樂椅，據知建制派曾建議由獨立議員謝偉俊（Paul）出任人事編制主席，不過阿Paul只係有意出任政制等三個委員會主席，失落呢三個委員會主席後，對於人事編制主席等疑似安慰獎毫無興趣，有人估計Paul可能最後乜都唔做。
Paul自一二年開始，連續三年出任政制委員會副主席，做慣副手自然想「升呢」坐正做主席，除此以外，身為律師嘅阿Paul亦對保安或司法工作有興趣，希望更上一層樓有更大參與空間。
不過，據聞建制派對於以上三個主席一早有屬意人選，而且有關方面亦認為不容有失，敲定人選後如非必要都唔會作任何變動，因此有傳阿Paul對於一個主席位置都無心中有氣，索性連過去有參與嘅司法委員會都冇加入。
對於今早進行嘅委員會正、副主席選舉，建制派再三協調後決定由新民黨葉劉淑儀及工聯會黃國健出任人事編制正、副主席，至於工務小組正、副主席則由工程界議員盧偉國，及航運交通界議員易志明出任。