政情：無悔返港 實搵曾銀
盛傳有機會喺下屆特首選舉「陪跑」嘅財政司司長曾俊華（鬍鬚曾），日前因忽然提出樓市措施「減辣論」惹起爭議，有傳北京擔心鬍鬚曾係地產商隻棋，「陪跑」機會即時幻滅，不過鬍鬚曾疑死心不息，最新一招係硬銷自己無悔於三十多年前決定由美國重返香港定居，原因之一係自己有尋根嘅心促使回港貢獻。無論如何，佢他日落任，笑騎騎帶住成篋錢返美國，一定再次認為當年返港嘅決定全對。
屢被批不知民間疾苦
正在美國外訪嘅鬍鬚曾於紐約美國華人博物館出席酒會致詞，主動提及三十三年前決定回港一事，自己回想對此事感到高興，而且係正確決定。
佢形容，當時作出呢個並非容易嘅決定，因當年屬於年輕嘅家庭，要由舒適嘅環境轉到陌生嘅環境再展開生活，加上八十年代初，香港嘅政治前景充滿不確定性，佢自稱有天生信心會解決問題，又認為本身有公共行政背景，直指可以為香港管治作出貢獻。
事實上，鬍鬚曾自從發表可能「減辣論」後，頻頻出招為此補鑊，之前已經借同美國聯儲局主席耶倫會面過橋，以此死撐自己多年來回應樓市問題都只能引用「標準答案」，以免被市場過分解讀，惹起爭議。
今次鬍鬚曾於外地主動提及無悔返港一事，似想轉達新嘅訊息，不過有意見指，如果政府當年唔係高薪養廉，鬍鬚曾都未必會二話不說就決定回流，而事實上，鬍鬚曾為官多年，其荷包年復年膨脹，但未見佢更為「接地氣」，反而多次被批不知民間疾苦。
亂噏犯眾怒早有前科
首先係一一年，鬍鬚曾被批唔知粟米斑塊飯嘅價錢，及至兩年前發表「中產論」，自稱中產其實係一種生活風格，引述文章指愛飲咖啡、愛睇法國電影等，而基於自己亦鍾意飲茶同睇電影，因此以中產自居，事後自然激起一眾「真中產」怒轟，唔知鬍鬚曾諗返起呢啲往事時，認為能否做到當日決定回港嘅初衷呢？