中環出更：迎戰消防 大輝嚴守「後方」
消防人員近日被揭多宗涉嫌集體性侵同袍醜聞，有前線消防員報案聲稱遭七名同袍脫褲手淫，有人網上流傳嘅相片更顯示有消防員遭同袍「夾手夾腳」、然後再以白色膏狀物體塞肛門，震撼全港。一向有踢足球嘅立法會議員林大輝，下個星期將與某消防局嘅足球隊比賽。佢笑言會考慮着足三條褲落場，又會嚴禁帶蛋糕進場，希望前線同後防都唔會「失守」！
沖涼都要搵隊友看門口
大輝尋日與傳媒聚會時自爆呢場消防大戰，笑言自己十分緊張，無論落場前、比賽期間，抑或賽後，都會做足多重「防範」措施，務求全方位「保護自己」。除咗着三條褲同禁止帶蛋糕，甚至諗過賽後唔沖涼直接走人。後來佢又改口話會沖涼，但會搵兩個隊友喺浴室門口看守住。
談及特首梁振英（CY），被視為「倒梁建制派」嘅大輝，聲稱自CY放下政治，專注發展經濟同改善民生之後，覺得大家「心靈相通」，關係好咗喎。佢又力數CY有三大優點，其一係重視漁農業，特登喺施政報告設立漁業基金，自己仲喺屋企種嘢；其二有「語言技巧」，值得年輕人學習；其三係「有情有義」，下屬民望低都唔會被炒，係個有承擔嘅僱主喎。
卓妮