中環出更：高永文「唔係波」落場獻醜10分鐘
世界盃就聽得多喇，無家者世界盃大家又聽過未呢？呢個世界盃係專畀啲曾經遭遇生活挫折嘅無家者參加，希望佢地重拾信心同重建生活目標。尋日卓妮去咗今屆無家者世界盃香港代表隊嘅授旗儀式，直擊擔任主禮嘉賓嘅食物及衞生局局長高永文醫生與立法會議員梁國雄（長毛），落場同一眾參賽者踢波嘅過程。腳穿波砵、但同時着咗條長褲嘅高醫生，全程表現生硬，冇乜掂波。期間有隊友喺禁區傳個高波畀佢頂頭槌射龍，點知佢就變咗頂空氣。好彩佢只係踢咗十幾分鐘就出場走人，先至冇累隊友輸波。
長毛冇氣 提早離場
高醫生致詞時解釋，以前佢都有踢下波，但依家老咗就少好落場，上一對波砵已經係廿幾年前買落，結果去年十月攞返出嚟比賽，踢兩下就「甩底」，要匆忙喺附近買過對新嘅。至於點解要着長褲踢波咁騎呢，佢自言自己有對「香雞腳」，因此絕少着短褲示人。
至於出名茅波嘅長毛，今次落場犯規少咗，開頭表現亦相當生猛，完全唔似就嚟六十歲，但原來佢嘅活躍表現已係維持到約三十分鐘，之後就要出場休息。高醫生同長毛先後被換走後，佢哋嗰隊由歷屆無家者世界盃代表隊組成嘅「曙光隊」，立即表現回勇，最終以二比一贏咗今年嘅代表隊。
另一主禮嘉賓和富社會企業會長李宗德（Joseph）尋日雖然冇落到場，但係就帶咗太太Josephine嚟捧場打氣。Josephine自言唔識踢波但識睇波，得閒就會跟埋香港女子足球隊到外地作賽兼睇波。Joseph就話自己細個時都有踢開足球，不過之後受過傷就唔敢再踢，但仍無損佢對足球嘅熱愛。
卓妮