公民講場：金刀梁怕怕 開會要搬竇

早前香港大學校務委員會開會討論副校長遴選事宜，港大學生不滿副校長任命要等到聘任首席副校長後先處理，於是衝擊校委會會議，搞到一鑊粥，話咁快校委會本周二又要開會繼續討論。有傳校委會猶有餘悸，打算改往港大沙宣道物業開會，避免受外來示威者衝擊。校委會主席梁智鴻（金刀梁）承認為確保所有人安全，校委會將討論下次開會地點。其實香港有幾大吖，想匿埋開會不如搬上月球開喇！教育界立法會議員葉建源就話，今次唔會再組織集會或呼籲校友出席，只會由港大校友關注組代表遞信喎！唔知係想向金刀梁派定心丸，定係被人批評佢縱容學生後知衰呢？