政情：鍾海燕印度發掘大商機
貪靚女士都知食澱粉質易致肥，肥人又係糖尿病高危一族。大家又估唔估到，以薄餅為主食嘅印度糖尿病患者竟多達一億五千萬人？做保健食品生意嘅「光學儀器大王」黃克競太太鍾海燕（Heidi），最近就意外發現呢個龐大商機，仲勇闖印度添！
當地公司主動謀合作
Heidi早前同合作夥伴余啟宸醫生去咗一趟印度，見識神秘國度嘅另一面。Heidi話，印度係佛教國家，大多數人食素，由於唔食肉易肚餓，所以佢哋食好多薄餅以便飽肚。但係麵粉嘅升糖指數高過米飯好多，印度人儲儲埋埋啲多餘熱量自然就易肥，故此九億人口中竟然多達一億五千萬人係糖尿病患者，真係得人驚。難怪去年有一間印度生物科技公司發現咗Heidi公司生產一隻純植物提煉嘅降血糖補充劑，如獲至寶，不停游說雙方合作。Heidi初初唔上心，一傾開即發現新大陸，梗係把握良機拍住搵商機。