政情：公民講場：阿基益民協 公帑助裝修

立法會議員大花筒使公帑唔使本真係愈揭愈有，除咗購買大量科技電子產品外，民協超級議員馮檢基仲申領近五萬元，為油麻地民協總部進行大裝修，包括修補假天花及換趟門門轆等。之後再分別申領三千多元為民協總部添置擴音器、手提電腦及碎紙機等。阿基解釋因為民協一直免費提供辦事處畀佢使用，所以佢要承擔總部大裝修部分開支喎。不過，立法會同政黨嘅資源咁樣溝亂嚟用，公帑用到唔清唔楚，難免被人質疑佢用公帑補貼自己個黨。