政情：莊健成教路：食晏防流會
元朗區議會交通運輸委員會（交運會）早前因為工聯會區議員姚國威要求點算會議法定人數，最終釀成流會。交運會上星期就加開特別會議，處理當日未能完成嘅議程，點知好不幸再次流會。原來交運會流會並非新鮮事，有交運會成員就直指係因為交運會主席、工聯會陸頌雄不擅主持會議。同係交運會成員嘅元朗區議員莊健成就送條橋畀陸頌雄，叫佢學吓元朗區議會主席梁志祥咁安排議員一齊食晏，可以減少流會風險。
學梁志祥「箍住」議員
早前姚國威因為不滿陸頌雄未有安排午膳時間，於是要求點算開會法定人數，最終導致流會收場。當日盡力趕回會議室嘅莊健成話，當日有好多委員不在場，當佢盡責趕返會議室時，已不能挽回流會局面。佢坦言，交運會會議同區議會大會一樣都經常由朝開到晚，但梁志祥每次都會邀請成班區議員同當日開會嘅官員一齊食飯，既可以加強溝通，有利合作，亦可以「箍住」班議員食晏後齊齊返去開會，一舉兩得。莊健成就建議陸頌雄可以學吓梁志祥做法，又或安排好午膳時間同預先通知大家，咁大家都可以有所準備喇。