政情：陳勇倡高官備「自炒信」
兩名問責局長突然被「炒魷」，雖然各有「死因」，但用「突然死亡」方式撤換問責局長確係少見，唔少政壇中人都覺得可以做得好啲。新界社團聯會理事長陳勇就建議，政府可以考慮參考英美等國嘅做法，喺聘用時要求高官簽定一封日期空白嘅辭職信，日後政府可隨時填上日期着令高官落台，咁樣社會亦唔會因為事出突然而大驚小怪。
效法英美 減少衝擊
身兼北區區議員嘅陳勇話，今次突然撤換原民政事務局局長曾德成及原公務員事務局局長鄧國威令各界都感到愕然，後續影響好大。佢哋到國外考察時，知道英、美及唔少歐洲國家都實施上述制度，以便執政者審時度勢更換內閣班子，佢認為港府不妨效法。佢仲話，唔少本港上市公司聘用高層管理人員時已援用相同嘅方法，以減少撤換高層對公司嘅影響。