政情：葉國謙田少行衰運
政改方案喺建制派離場「甩轆」下以大比數被否決，幾位「甩轆」關鍵人物事後都遭遇大起大落，最初被指係「政改罪人」，但上月又重新翻案，反指唔跟大隊離場嘅自由黨先係政改「甩轆元兇」。究竟多位關鍵人物喺嚟緊嘅運程如何呢？有師傅話，事件中要求眾議員離場嘅經民聯議員林健鋒（Jeffrey）運勢有好轉迹象，唔使太擔心，但作為建制派「班長」嘅民建聯（民記）葉國謙運勢會轉弱，明年更可能會「玩完」！
譚耀宗秋後唔吉利
香港術數家協會術數師楊子東批算，雖然Jeffrey今年中咁多波折，但本周六立秋後運勢尚好，到農曆九月又再不吉利，但唔使太擔心，因為明年運勢會轉好。至於葉國謙就唔樂觀喇，事關佢立秋之後運勢會轉弱，農曆七月會更加不利，明年將會更差，仕途甚至「玩完」添！最近已有呼聲要求更換建制派「班長」一職，更盛傳明年立法會選舉要葉國謙交番個議席出來，未知批算係咪預視呢兩個傳聞。
至於留守會議廳同泛民主派一齊投票嘅自由黨田北俊，楊師傅話佢犯「三刑」，口舌招尤，九月不吉利，明年將會更差。楊師傅續稱，其實民記多位成員流年都相當不利，好似前主席譚耀宗（譚Sir）同現任主席李慧琼（Starry）都被批明年運勢會轉差。其中譚Sir今年運勢已經勉勉強強，立秋之後更轉向唔吉利，預計明年會急轉直下。而身兼行政會議成員嘅Starry，農曆九月將會面對好大壓力，明年運勢亦都轉差。
葉劉撞麒麟 勢走下坡
不過，被指在「甩轆」事件中參與建制派WhatsApp群組有違中立嘅民記立法會主席曾鈺成，立秋後反而會轉順，農曆九月更加大旺，明年運勢亦可。此外，年初在車公廟被舞麒麟撞飛嘅新民黨葉劉淑儀，即使在政改「甩轆」事件後哭成淚人，博得一時同情，但運勢似乎未見起色，同樣立秋後走下坡，有志難伸，明年更差。不過，風水命理嘅嘢都係信則有、不信則無，大家無謂太認真，隨遇而安就得嘞。