中環出更：「星爺」識破假中聯辦電話騙局

近期假冒速遞公司及中聯辦嘅電話騙案急升，唔少市民都收到呢類詐騙電話，甚至中招受騙。不過，原來最受呢類詐騙電話困擾嘅係香港嘅一班人大代表同政協委員，皆因佢哋當中亦都有唔少人收過呢類詐騙電話，加上佢哋經常都要同內地以及中聯辦有聯繫，真係好容易中招，為咗唔好成為騙徒嘅獵物，佢哋都已經互相提醒大家要小心。

本身係人大代表嘅金融界立法會議員吳亮星（星爺）就話，佢已經收過兩、三個冒認係中聯辦打畀佢嘅電話，但因為聽落似係電話錄音，加上對方竟然會讀出中聯辦嘅全名，所以佢未聽對方講完就收咗線喇。星爺又話，中聯辦有專門與人大聯絡嘅人員，所以一聽唔係該人員把聲，已經知係有古怪。

而同樣都係人大代表嘅體育、演藝、文化及出版界立法會議員馬逢國就話，佢過往都有收到「猜猜我是誰」之類嘅詐騙電話，但冒認中聯辦嘅就冇喇，佢仲話作為人大應該都冇咁易上當。而港區人大代表、東區區議員蔡素玉就話，其實佢哋好少會收到中聯辦信件及包裹，所以一有呢啲聲稱係速遞公司嘅電話都可以收線喎。

卓妮