中環出更：撐餵母乳力陳美事
近年多咗媽媽選擇餵哺母乳，但街外或辦公室可以餵母乳嘅地方並唔多，搞到啲媽媽不時要左掩右避，適逢本周係國際母乳哺育周，聯合國兒童基金香港委員會尋日就推出「母乳育嬰齊和應」活動，呼籲社區為哺乳媽媽提供支援及建立對母乳餵哺嘅正面態度。委員會主席陳晴（Judy）同副主席孔美琪（Maggie）都係餵哺母乳支持者，除咗對小朋友健康有正面影響，對媽媽亦有好處。
BB免疫好 媽媽修身快
話說Judy當年用母乳足足餵咗小朋友兩年零三個月咁耐，而餵母乳之後，小朋友三歲前都冇試過發燒及腸胃炎，抵抗力明顯較好，而且仲好快修到身，以佢為例，餵咗大約一個月母乳已經激減二十三磅，變番懷孕前身形，係意外收穫。不過，作為媽媽對於一啲刺激食物如貝殼類、杧果、辛辣食物等都唔可以食，因為唔多唔少會影響母乳嘅味道喎。
至於Maggie亦係過來人，曾經餵過母乳畀兩個女，對於坊間部分媽媽話餵唔到咁耐母乳，佢就話只要記住有需求加上個人意志，就會有供應。至於戒口，佢就話懷孕期間都戒咗咁耐，唔差在多幾個月，又話好多陪月都教新手媽媽飲木瓜魚湯，有助催乳。
中大九月再增哺乳室
同場仲有食物及衞生局局長高永文、副局長陳肇始及香港中文大學副校長張妙清。張妙清話，中大亦有接近一半職員都係女性，過往都有女職員生完小朋友後，要匿喺辦公室一啲房間餵哺嬰兒。
為咗鼓勵餵母乳嘅文化，現時中大已設三個哺乳室，另九月再有多一間啟用，希望在職媽媽都可以安心使用。
卓妮