馬鞍山一間酒樓嘅雪櫃兩年前因為用易燃雪種而產生爆炸，造成廿幾人受傷。工程界立法會議員盧偉國尋日就事件向政府提出質詢，要求政府檢討現行規管雪種安全嘅機制。人民力量議員陳偉業（大舊）借題發揮，講到雪種即借詞諷刺立法會主席曾鈺成「無種」，容許警方入立法會候勤。
當時曾鈺成唔在場，係由代主席梁君彥主持會議。梁君彥一聽即話大舊離題，要求佢停止發言，唔係就趕佢出場。大舊發難話，「你唔使趕我走，我依家離場抗議」，之後大搖大擺離開會議廳。
環境局局長黃錦星回應話，過去只有四單使用易燃環保雪種嘅個案，佢認為業界無誘因亦冇趨勢使用易燃雪種，對於市面上有廣告宣稱環保雪種可取代傳統雪種，佢話會同業界溝通和研究喎！