政情：收料站：創科局申撥信可區選前通過

我哋收到風，政府已決定將創科局撥款「硬闖」財委會，並「打尖」申請先行審議創科局，然後先到其他民生事項撥款，估計泛民議員即使「拉布」，玩到十一月都會就範。

排隊審議 壓力轉嫁泛民

創科局撥款多次受阻，但政府消息人士對今次好有信心，因為佢哋打算將創科局撥款放喺幾項重要民生撥款議案之前，例如公務員加薪、綜援、生果金出三糧及公屋免租等，藉此將壓力轉嫁予泛民。如果議員拉倒創科局撥款，等同拖延公務員及基層市民受惠，變相與民為敵。

不過，同一招數去年政府都用過，最終未能奏效，今年政府咁有信心全因區議會選舉臨近，預計喺十一月區選前即可通過創科局撥款。到底呢個如意算盤係咪打得響，過多幾個月就知。