政情：八網難逃：廖成利選戰需求「子彈」
台灣早年嘅大選曾因兩粒子彈令選情丕變，外號「老虎仔」嘅民協廖成利近日於社交網站突然話，未來一戰嘅三大致勝原因，其中一個係「只需一粒子彈」，令人有無限想像空間。老虎仔解釋，佢所指嘅「子彈」其實係「三力」，即人力、物力及財力，事關佢哋冇大水喉支持，好似民協馮檢基及蔣志偉等人出席嘅籌款晚宴，粗略估計只籌得十多萬元。
據知民協四出搵「子彈」，或者同佢哋想開水喉資助疑似參選人有關。老虎仔話，民協初步計劃年底派出廿六人參選，包括新人同舊人各十三人，擬資助每人數萬元作競選之用，如果用多過呢筆數就要自己「包底」。另一方面，佢哋又幫各區疑似參選團隊改定花名，包括「深水埗少林足球」、「龍城七子」、「油尖三劍俠」等，咁絞盡腦汁都係為咗增加知名度，認真係用心良苦。