中環出更：陳健波唔畀政治入屋苑
保險界立法會議員陳健波鍾情投資豪宅，年前先後買入南區豪宅屋苑貝沙灣多個單位，本身係業主委員會主席嘅佢，早幾日以九成七信任票成功連任。貝沙灣屬於南區嘅薄扶林選區，聽聞現屆區議員司馬文考慮競逐連任，自由黨嘅楊哲安亦對該議席虎視眈眈，雖然陳健波本身係建制派議員，但係佢表明唔會偏幫任何一方，因為佢覺得唔應該畀政治滲入屋苑喎！
好少立法會議員會兼任業主委員會主席，陳健波係例外。佢話本來諗住專注立法會工作，計劃交棒，可惜冇人肯做，惟有自己頂硬上做多屆。
拒政黨進內宣傳
陳健波透露，司馬文同楊哲安早前分別見過佢，希望佢可以為選舉打開方便之門，例如畀佢哋喺屋苑範圍派發宣傳單張咁。但佢話，業主委員會係幫居民解決問題，佢作為主席亦要維持中立，所以講明唔會畀佢哋入去宣傳，亦唔會偏幫任何一方。唔知隨住選情愈趨緊張，兩人會唔會成功游說佢呢？
卓妮