大埔：投訴大廈僭建 屋署龜速處理
「個天台有鐵皮屋又有鐵枝，仲鋪咗好多帆布，樓下就係馬路，萬一跌咗落街都唔知點算！」黃小姐指大埔鄉事會街有大廈天台設有僭建物多年，由於鄉事會街鄰近街市，平日人流眾多，擔心僭建物一旦損壞並有碎片從天而降，或會危害途人性命，不滿屋宇署一直未有取締。
接本報轉介 拖半年回覆
屋宇署於接獲本報轉介後半年始作回覆，證實上址天台有僭建物，將透過大規模行動向有關業主發出清拆令，並已先發信予業主，敦促盡早自行安排清拆有關僭建物。
黃小姐批評屋宇署未有嚴厲執法，令僭建問題不減反增，「屋宇署做嘢實在太慢，投訴咗成半年先回覆，難怪條街都仲有咁多僭建啦！」黃認為倘當局人手不足，便應大幅增聘人手，而非「龜速」處理個案，否則市民會對部門失去信心，亦變相縱容違規者。