政情：中環出更：郭家麒搬發電機入立會

猶如「無掩雞籠」嘅立法會大樓，再有泛民議員助理涉嫌違規帶入易燃物品。我哋收到風，尋日下午約四時半，公民黨議員郭家麒嘅四名助理以板車運送一部發電機入立會，遭保安截停查問。眾人理論期間，郭家麒趕到現場，不理保安勸阻下自行帶走四人及發電機。

據聞，當時保安懷疑發電機內存有電油，故要求四人打開發電機檢查，但四人唔肯配合，更致電郭家麒求助。保安惟有到八樓郭嘅辦事處察看，聞到廁所傳來濃烈電油氣味，估計佢哋已將發電機內電油倒入馬桶內。’

郭接受查詢時指，助理搬入嘅係買返來嘅全新發電機，認為立會保安刻意留難。不過佢承認發電機內可能存有少量電油，因買新機時要用油測試，可能仲剩番少少喺機底。佢批評有人故意將件事無限放大，仲辯稱若唔畀攜帶電油入立會，係咪停車場所有車都唔畀入喎。

立法會秘書處得悉事件後認為事態嚴重，已發通告提醒議員不得帶入易燃物品，立法會行政管理委員會亦會跟進討論有關事宜。

卓妮