中環出更：陳裕光籲企業傳承男女平等
交棒係唔少家族企業面對嘅問題，點樣順利安排世代交接，係一門大學問。接掌家族製衣生意多年嘅香港青聯副秘書長林玉茵（Maya）早前搞個傳承之道研討會，唔少青聯兄弟姊妹去分享。身兼傳承學院榮譽主席嘅大家樂主席陳裕光（Michael）話，中國人仍有重男輕女觀念，有企業家寧願交棒畀只有十幾歲嘅兒子，都唔肯畀女兒接手，佢認為應及早打破呢種偏見。
當日Michael及投資銀行高層Eric Landolt齊去做講者。Michael話，中國人交棒意識比起歐洲及亞洲其他國家顯得好落後，唔少企業家思想保守，往往以為自己仲做得，唔想早啲做好接班安排，一旦發生意外或患病，想搵人交棒都嚟唔切。
林玉茵獲媽咪力谷接棒
Maya分享自己接棒經歷時話，做過保良局主席嘅媽媽梁寶珠鼓勵佢畢業後先喺外面工作幾年，於是佢加入某國際品牌珠寶部，原本打算返一個月工體驗吓就走，點知一做幾年，仲升職做咗總監。Maya笑稱，因為太愛珠寶，唔捨得辭工，所以依家要用盡時間。雖然Maya身兼兩職，但佢媽咪無因此錫住佢，有時夜晚九點諗起有工作想傾，照樣打電話畀個女開會喎！
中華總商會青年委員會副主席林智彬都有到場，佢直言自己較幸運，由爸爸福建社團聯會永遠名譽會長林銘森手上接下家族玩具生意，算係無風無浪。事關佢爸爸好開明，兩父子乜都傾。
卓妮