中環出更：轟拉布嘥錢 阿王遭反狙擊
立法會預算案「拉布」戰已經持續咗十一日，每逢「拉布」必鬧泛民嘅工聯會（工記）立法會議員王國興（阿王）沉寂一輪之後，尋日終於按捺不住，狂轟「拉布」係倒錢落鹹水海，又趁機為工記平反，指有議員藉「拉布」抹黑工記，不過工記之心可昭日月云云。
發言五度被「剪布」
人民力量陳偉業（大舊）同埋社民連梁國雄（長毛）就多次作出狙擊，令阿王發言期間五次被「剪布」，認真無癮。
阿王好勞氣話，「拉布」唔止嘥時間，每日仲浪費二百六十九萬元公帑，四年來已嘥咗廿六億元。佢之前唔出聲，係因為唔想變相助長「拉布」咁話。聽到阿王咁講，大舊同長毛先後發功，質疑佢藉發言時間宣傳工記。主席曾鈺成就叫佢集中番喺討論嘅題目上。阿王唔忿氣話，大舊同長毛嘅做法只會令公眾更加關注佢講嘅嘢，又叫大舊「睇清規程，唔好甩鬚」喎！
雖然阿王鬧「拉布」被人狙擊番轉頭，但大舊承認喺分組及限時辯論嘅情況下，「拉布」經已名存實亡，唔知阿王條氣有冇順番啲呢？
卓妮