中環出更：曾德成鬼祟「落地」銷政改

上周六以政改三人組為首嘅一眾政治任命官員以巴士巡遊方式，先後到堅尼地城、樂富及大埔宣傳政改，但被批評落區唔落地係「堅離地」。唔知係咪吸取教訓，尋日朝早民政事務局局長曾德成就靜雞雞到筲箕灣「落地」派單張，未夠八點半就離去，做法好鬼祟。

同曾德成一齊落區嘅仲有副局長許曉暉、政治助理徐英偉等人，佢哋出現喺筲箕灣港鐵站出口嘅巴士總站，同街坊派發宣傳政改單張。今次落區活動事前冇公開，事後由徐英偉將相放上社交網站，新聞統籌專員馮煒光仲加把口留言指：「做得好！誰說官員不落地？」

徐英偉話，佢哋希望趁返工人潮出現時宣傳政改，不過一行人只停留約四十分鐘，約八時半就離開。據了解，往後將陸續有司局長以類似方式落區宣傳政改。

政務司司長林鄭月娥就為「堅離地」解畫，佢話事前知悉有人動員示威者狙擊，評估過後認為落地亦未必可達到效果，加上不想警員及示威者因此受傷，故採取此做法。