- on.cc 東方互動主頁
- 3月29日 (六)
民主黨（白鴿黨）二○一○年轉軚撐政改成為被狙擊對象，佢哋今次再面對政改頓成驚弓之鴿，一早表明堅決反對「八三一」決定下嘅政改方案。學民思潮發言人黎汶洛（Oscar）日前就話收到風，白鴿黨立法會前議員張文光將「佔領中環」發起人戴耀廷嘅方案呈交中央，如中央讓步就可促成泛民轉軚。聽到「轉軚」兩字就嚇到震嘅白鴿黨漏夜發聲明澄清。雖然Oscar之後收回言論，但就話會繼續監察政黨同議員舉動。白鴿黨身為泛民大黨，咁就畀個學生哥拋窒，教人情何以堪。
戴耀廷早前提出「五分四方案」，即特首參選人須獲五分之四提名委員會委員支持方可出閘。Oscar日前爆料話，張文光已將呢個方案呈交畀中央傾，白鴿黨知悉後就即刻發表聲明，話有關消息屬誤導資訊，係子虛烏有。
Oscar尋日亦都收番有關言論，但就話有關消息喺社運及政黨圈子流傳超過半個月，認為「空穴來風必有因」，望市民繼續監察政黨同議員嘅政治舉動咁話。張文光被屈後唔止冇勞嘈，仲好客氣話歡迎年輕人勇於改正，如果將來有機會都希望同Oscar多啲溝通喎。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
