中環出更：工展擴版圖 殺入葵涌
講起香港中華廠商聯合會（廠商會），相信最為大眾熟悉係於維園一年一度嘅工展會，據聞廠商會有意擴大展區，除咗計劃年底喺葵涌區搞一個規模較細啲嘅工展會外，廠商會副會長戴澤良透露初步有兩大想法，第一係租用中央圖書館嘅展覽室或會議室，主要係畀後生仔或社企擺檔，第二係於維園嘅有限空間內加設幾個檔位。
明年或租用中央圖書館
戴澤良話，基於中央圖書館相關展覽室或會議室今年已全數租出，可能要明年先有機會做到。另外，面對南韓首爾東大門等衣飾批發市場大行其道，廠商會會長李秀恒提出於長沙灣發展時裝飾物批發中心，紅磡發展珠寶皮革批發中心，但佢強調，有關構思唔係針對水貨客問題，旨在加強香港嘅商業模式，正與政府多個部門商討建議。
卓妮