中環出更：河北過新春 啟剛弄兒樂
香港專業及資深行政人員協會（專資會）日前舉行新春團拜，出席嘅香港青年聯會主席霍啟剛一講起初學行路嘅囝囝中曦，表現雀躍。佢話囝囝漸懂事，所以趁今個新春帶埋中曦返太太郭晶晶嘅家鄉河北過農曆新年。中曦初次學識拱手做恭喜手勢向長輩拜年，人見人愛，逗利是破晒紀錄。
啟剛話，河北過年氣氛濃厚，佢都入鄉隨俗放煙花，又帶囝囝去北京睇雪景。佢話囝囝睇見地下皚皚白雪，反應搞笑，先係呆了一呆，定神後就跳跳紮紮，活躍程度，似足媽咪。囝囝利是進帳豐收，金額有幾多就唔講嘞，但啟剛話會將利是錢儲起來，成立教育基金。
謝偉銓指收緊按揭無用
專資會前會長謝偉銓（Tony）都有出席團拜，講起政府再加推樓市「辣招」，透過金管局收緊按揭，Tony直言措施並無對症下藥，無助解決樓價高企問題。佢話市民無咁多錢上車，惟有打細價盤主意，措施勢必進一步推高小型住宅樓價。佢批評政府調控樓市，只得一招，未有全盤周詳規劃，有必要好好檢討。
梁智仁感冒 病向淺中醫
樓價高企，高官、市民都唔好過，但點煩都唔及殺到埋身嘅流感。醫院管理局主席梁智仁月前都感冒。雖然佢係西醫出身，但都幾好中藥，感冒初起時會食少少枇杷膏，當堂舒服晒。不過，佢強調呢招未必人人啱用，若然覺得感冒發燒，都係病向淺中醫喎。
卓妮