政情：「安」步馬拉松
一年一度馬拉松賽事前日舉行，吸引城中唔少做開運動嘅政商界名人參加，其中教育局前政治助理楊哲安今年係第五年參加，佢自爆以前唔鍾意長跑，反而享受短跑嘅爆炸力，直到二○○一年喺倫敦被同事挑戰，及後勤操半年，並於當地參加全馬賽事後感覺良好，回港後就繼續參加馬拉松賽事。
楊哲安着「五指鞋」參賽
楊哲安當日着住嘅跑鞋亦有名堂，就係叫做「五指鞋」，佢透露着五指鞋需要時間適應，頭半年都好唔習慣，跑約二百米已經想抽筋，但係後來着得耐就感覺，小腿及腳掌等平日少用嘅肌肉部分都發達咗，仲連帶着鞋號都變大咗，笑言要換過批新鞋咁話喎。
中華廠商聯合會青委名譽主席周雯玲（Irene）與副主席劉子芸、黃大仙區議員丁志威、理文造紙首席執行官李文斌等名人都有參加馬拉松賽事。今年跑十公里賽事嘅Irene表示，跑步時節奏好緊要，又話聽住快歌跑可以令自己冇咁易攰同放棄，期望明年有機會挑戰半馬賽事。