- on.cc 東方互動主頁
- 4月11日 (五)
居不易，置業難，成為香港之痛，更成為民怨焦點。新一份施政報告例牌將房屋問題作為重點，推出多項措施，係威係勢咁，可惜吖，巧婦難為無米炊，港府覓地阻力重重，呢啲措施究竟有幾大成效，救唔救到火，仲要睇過至知。
呢嗱，施政報告聲稱多管齊下增加土地及房屋供應，其實多數係炒冷飯，冇乜新意，唯一亮點可能就係所謂「居屋三級制」，包括繼續提供傳統居屋、將部分興建中嘅公屋改作「廉價居屋」出售、邀請市建局提供「高檔居屋」。換句話講，居屋將會有三種標準，高、中、低價，各適其適，任君選擇，其中出售公屋正名為綠置居先導計劃，聽落都幾特別嘅。
即係咁，每個人嘅經濟能力唔同，當局提供多種置業階梯，點都好過冇得選擇。問題係，公屋供應本來就嚴重短缺，搞到輪候人龍愈來愈長，已經突破二十六萬大關，家陣仲要將部分公屋改為居屋出售，豈不是買少見少？輪候時間豈不是更長？雖然話參與綠置居先導計劃嘅買家要交回本身公屋單位啫，但整體供應冇增加，淨係靠挖東牆補西牆，始終解決唔到問題。正如有關注團體話齋，呢啲純屬數字遊戲，個餅冇加大，只係切嘅方法唔同咋。
不過點都好喇，當局肯搞搞新意思，總算係一種進步，起碼可以收到拋磚引玉嘅效果。嗱，施政報告出爐之後，市建局即時公布啟動紅磡春田街及崇志街重建項目，預計可提供一百五十個中小型住宅單位；而地產界亦坐言起行，有富商推出兩幅地皮包括大坑西新邨，準備興建免首期嘅廉價出售房屋同埋平租宿舍，紓緩年輕人嘅住屋壓力。
冰凍三尺，非一日之寒。房屋問題不斷惡化，完全係前朝貪曾政府任內無所作為種落嘅惡果，家陣積重難返，尾大不掉，甚至變成政治炸彈，搞到民怨四起，永無寧日。要拆除呢個炸彈，淨係靠政府係唔夠嘅，必須有新思維，鼓勵全社會積極參與，尤其係同私人發展商合作，咁至可以事半功倍吖嘛。所以話，有人捐地起屋絕對係一件值得鼓勵嘅好事，弊在香港愈來愈政治化，政客為反對而反對，價值觀被嚴重扭曲，萬一商人捐地惹來「官商勾結」嘅質疑，咁就好事變壞事嘅喇。
正所謂，弱勢政府百事哀。當局空有建屋大計，可惜覓地無策，加上反對派全面不合作，連發展新界東北都係得個講字，想解決房屋問題都幾難，無殼蝸牛睇怕又係得個望字嘅咋！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
